នៅព្រឹកនេះ , ពិធី ថ្វាយព្រះពរក្នុងព្រះរាជឱកាស នៃព្រះរាជពិធីចំរើនព្រះជន្មគម្រប់៧០ យាងចូល៧១ ព្រះវស្សា ថ្វាយដល់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ធ្វើនៅវត្តទេពនិមិត្ត ហៅវត្តថ្មីក្នុងខេត្តកោះកុង !!
(ដោយ លោក សំរិទ្ធ ភារុន)
ខេត្តកោះកុង ÷ មន្ទីរធម្មការ និងសាសនាខេត្តកោះកុង រួមជាមួយគណៈសង្ឃ នៃវត្តទេពនិមិត្តហៅវត្តថ្មី បានរៀបចំពិធីថ្វាយព្រះពរដល់ ព្រះករុណាព្រះបាទព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាក្នុងព្រះរាជពិធីចំរើនព្រះជន្មាយុគម្រប់៧០ យាងចូល៧១ ព្រះវស្សា ប្រារព្ធឡើងនៅព្រឹកថ្ងៃទី១៤ ខែឧសភា ឆ្នាំ២០២៣ នៅវត្តទេពនិមិត្ត ហៅវត្តថ្មី ស្ថិតក្នុងភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
ក្នុងព្រះរាជពិធីនេះមានការនិមន្តចូលរួម ពីសំណាក់គណៈមន្ត្រីសង្ឃ ដឹកនាំដោយ ព្រះលក្ខណ៍មុនី វង្ស ពិជ័យ ព្រះរាជាគណៈថ្នាក់កិត្តិយស ជាព្រះសមុទ្ទគង្គាមហាមុនី ព្រះមេគណគណៈធម្មយុត្តិកនិកាយ ខេត្តកោះកុង និងជាព្រះចៅអធិការវត្តទេពនិមិត្តហៅវត្តថ្មី ព្រមទាំងបានការចូលរួមដោយលោកជំទាវ សំស៊ី ភូថង ភរិយាឯកឧត្តម យុទ្ធ ភូថង រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម/លោកជំទាវសមាជិកក្រុមប្រឹក្សាខេត្ត គណៈអភិបាលខេត្ត គណៈអភិបាលក្រុងស្រុក លោកប្រធាន/អនុប្រធានមន្ទីរធម្មការ និងសាសនាខេត្ត ថ្នាក់ដឹកនាំមន្ត្រីរាជការគ្រប់បណ្តាមន្ទីរអង្គភាពជុំវិញខេត្ត កងកម្លាំងទាំង៣ប្រភេទ លោកគ្រូ/អ្នកគ្រូ សិស្សានុសិស្ស ក្រុមយុវជន និងប្រជាពលរដ្ឋយ៉ាងច្រើនកុះករ ។
ព្រះលក្ខណ៍មុនី វង្ស ពិជ័យ ព្រះរាជាគណៈថ្នាក់កិត្តិយស ជាព្រះសមុទ្ទគង្គាមហាមុនី ព្រះមេគណគណៈធម្មយុត្តិកនិកាយ ខេត្តកោះកុង និងជាព្រះចៅអធិការវត្តទេពនិមិត្តហៅវត្តថ្មី បានអាន និងសូត្រសារថ្វាយព្រះពរថ្វាយដល់ ព្រះករុណាព្រះបាទព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នាឱកាសថ្ងៃចំរើនព្រះជន្មវស្សា ព្រះជន្មគម្រប់៧០ យាងចូល៧១ ព្រះវស្សា
ហើយក្នុងឱកាសដ៏សែននក្ខត្ត ឫក្ស និងថ្លៃថ្លាបំផុត នៃការប្រារព្ធព្រះរាជពិធីចម្រើនព្រះជន្មរបស់ព្រះមហាក្សត្រនៃព្រះរាជាណាចក្រកម្ពុជា នេះដែរវត្តទេពនិមិត្តហៅវត្តថ្មី បានរៀបចំកម្មពិធី សាសនា នមស្សការ សូត្រមន្ត ជ្រូចទឹក ប្រគេនទេយ្យទានព្រះសង្ឃ និងថ្វាយនូវកន្រ្តកផ្កា ថ្វាយ ព្រះមហាក្សត្រ ព្រមទាំងរាប់បាត្រ ព្រះសង្ឃចំនួន៤៥អង្គ ដើម្បីសូមព្រះបរមរាជាអនុញ្ញាតលំឱនកាយវាចារចិត្ត ក្រាបបង្គំសំដែង ថ្វាយព្រះពរសព្ទសាធុការពរជ័យ សូមព្រះបរមីយព្រះមហាស្វេតឆត្រ និងវត្ថិស័ក្តសិទ្ធក្នុងលោក ប្រទានព្រះពរជ័យ បវរសួស្តី សិរីវឌ្ឍនា វិបុលសុខ មហាប្រសើរគ្រប់ប្រការ ថ្វាយព្រះករុណា ជាអម្ចាស់ជីវិតតម្កល់លើត្បូង សូមទ្រង់មាន ព្រះពលានុភាពខ្លាំងក្លា ព្រះបញ្ញាញាណភ្លឺថ្លា ព្រះកាយពលមាំមួន ព្រះរាជសុខភាពល្អបរិបូរណ៍ ព្រះជន្មាយុយឺនយូរជាងរយព្រះវស្សា ដើម្បីទ្រង់គង់ប្រថាប់ក្នុងព្រះសិរីរាជសម្បត្តិជាម្លប់ដ៏សែនត្រជាក់ត្រជុំដល់ប្រជានុរាស្រ្ត ជាកូនចៅរបស់ព្រះអង្គរស់នៅសេចក្តីសុខក្សេមក្សាន្ត ឆ្ពោះទៅកាន់វឌ្ឍនភាពជានិច្ចនិរន្តរ៍ និងចម្រុងចម្រើនថ្កុំថ្កើនតរៀងទៅ៕
Post a Comment