កិច្ចការពារសម្បត្តិ បេតិកភណ្ឌវប្បធម៌ជាតិជាភារកិច្ច របស់កូនខ្មែរគ្រប់ៗរូប

សំរិទ្ធភារុន : 

ខេត្តកោះកុង :នារសៀលថ្ងៃទី ៨ ខែកញ្ញា ឆ្នាំ ២០២៤ លោកជំទាវ មិថុនា ភូថង អភិបាលនៃគណៈអភិបាលខេត្តកោះកុងអញ្ជើញជាអធិបតី ក្នុងពិធីបើក និងបិទបញ្ចប់ ព្រមទាំងចែកប័ណ្ណសសើរ ផ្តល់ប្រាក់លើកទឹកចិត្ត ក្រោយពីរកឃើញអ្នកដែលទទួលជ័យលាភីក្នុងការប្រឡង ផ្នែកល្ខោននិយាយឈុតខ្លី និងចម្រៀងសម័យកុមារ  ក្នុងខេត្តកោះកុង៍។ 

       លោកជំទាវ មិថុនា ភូថង អភិបាលខេត្តកោះកុង ÷ បានសម្តែងនូវការកោតសរសើរចំពោះថ្នាក់ដឹកនាំមន្ទីរវប្បធម៌ និងសិល្បៈខេត្តកោះកុង អង្គភាព ពាក់ព័ន្ធ លោកនាយក លោកគ្រូ អ្នកគ្រូ អាណាព្យាបាល ពិសេសក្មួយៗទាំងអស់ ដែលបានខិតខំប្រឹងប្រែង បង្កើតនូវ កម្មវិធីមហោស្រពសិល្បៈថ្នាក់ខេត្ត ឆ្នាំ២០២៤ នេះឡើងប្រកបដោយភាពអធិកអធមគួរជាទីមោទក។ ទាំងនេះ គឺបាន បង្ហាញពីការយកចិត្តទុកដាក់ក្នុងកិច្ចសហការគ្នាដ៏ស្អិតរមួតរវាង រដ្ឋបាលខេត្ត ជាមួយមន្ទីរវប្បធម៌ និងសិល្បៈខេត្ត កោះកុង និងអង្គភាពពាក់ព័ន្ធទាំងអស់ក្នុងការលើកស្ទួយ អភិរក្ស អភិវឌ្ឍ វិស័យវប្បធម៌ជាតិ សមដូចពាក្យមួយឃ្លារ លើកឡើងថា កិច្ចការពារសម្បត្តិបេតិកភណ្ឌវប្បធម៌ជាតិ ជាភារកិច្ចរបស់កូនខ្មែរគ្រប់ៗរូប។ 

       លោកជំទាវ ÷ បានគូសបញ្ជាក់អោយដឹងថា នៅក្នុងយុទ្ធសាស្ត្របញ្ចកោណរបស់រដ្ឋាភិបាលអាណត្តិទី៧ ដែលមាន សម្តេចមហាបចទើបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា ក៏បានយកចិត្តទុកដាក់លើវិស័យវប្បធម៌ជាតិ ក្នុងនោះសិល្បៈ បាន ដើរតួនាទីសំខាន់ក្នុងការបម្រើអារម្មណ៍របស់មហាជន និងជាប្រភពនាំមកនូវភ្ញៀវទេសចរណ៍វប្បធម៌ក្នុងតំបន់ ដែល បានបង្កើតការងារដល់ប្រជាពលរដ្ឋ ជួយលើកកម្ពស់ជីវភាពប្រជាជន និងជួយបង្កើនចំណូលដល់ថវិកាជាតិ។ ដើម្បីលើកស្ទួយ អភិរក្ស និងអភិវឌ្ឍវិស័យវប្បធម៌ជាតិប្រកបដោយភាពវិជ្ជមាន យើងម្នាក់ៗ ត្រូវបំផុសគំនិតឱ្យមហា ជនទូទៅចូលរួម រក្សាចាស់ បង្កើត និងអភិវឌ្ឍថ្មី ពិសេសក្នុងស្រទាប់យុវជន និងកុមារ ដែលជាអ្នកបន្តវេនទៅថ្ងៃអនាគត។ 

       លោកជំទាវ បានបន្ថែមថា ÷ ការលើកស្ទួយសិល្បៈជាតិ មិនថាក្នុងទម្រង់ណា គឺបានបង្ហាញពីមនសិការរស្នេហាជាតិមួយផ្នែក ពិសេសគឺបានចូលរួម ការពារ ផ្សព្វផ្សាយវប្បធម៌ និងអត្តសញ្ញាណជាតិឱ្យទូលំទូលាយជាសកល។ ស្រទាប់យុវជន និងកុមារ ជាទំពាំងដែល យើងត្រូវសណ្តុះ ថែទាំ និងសាបព្រួសនូវវប្បធម៌ល្អៗ ដល់ពួកគាត់ ដើម្បីរក្សាបាននូវអត្តសញ្ញាណជាតិឱ្យបានគង់វង្ស ជានិច្ចនិរន្តរ៍។ ក្នុងកិច្ចការពារបេតិកភណ្ឌជាតិ យើងត្រូវសិក្សាស្វែងយល់ចងក្រង សិល្បៈ វប្បធម៌ចាស់ៗ បង្កើតវេទិកា ឬកម្មវិធីដើម្បីផ្សព្វផ្សាយ និងជំរុញឱ្យរស់ឡើងវិញនូវសិល្បៈដែលបានបាត់បង់ និងជិតបាត់បង់។ ក្នុងនោះផង ដែរ មហាជនគ្រប់រូប គ្រប់មជ្ឈដ្ឋាន ត្រូវចូលរួមការពារ និងលើកស្ទួយសិល្បៈខ្មែរយើងគ្រប់ទម្រង់ ទៅតាម លទ្ធភាព ដែលអាចធ្វើទៅបាន ព្រោះវាជាព្រលឹងជាតិរបស់យើង ដូចពាក្យស្លោកមួយឃ្លាបានលើកឡើងថា «វប្បធម៌រលត់ជាតិ រលាយ វប្បធម៌ពណ្ណរាយជាតិថ្កើនថ្កាន។ 

ទាំងអស់ ដែលបានចូលរួមនាឱកាសនេះ នឹងបានយល់ជ្រាបកាន់តែ ច្បាស់អំពីគុណតម្លៃនៃវប្បធម៌ជាតិ បន្តជំរុញលើកទឹកចិត្តដល់អ្នកជំនាន់ក្រោយៗទៀត ដែលជាអ្នកបន្តវេនឱ្យចេះ ស្រលាញ់ចេះការពារ និងលើកស្ទួយសិល្បៈរបស់ខ្មែរ ទោះមិនបានគ្រប់ទម្រង់ ក៏បានក្នុងទម្រង់ណាមួយដែល យើងមានលទ្ធភាពក្នុងការចូលរួមថែរក្សា។ ជាក់ស្តែង នៅក្នុងកម្មវិធីមហោស្រពសិល្បៈនាឱកាសនេះ យើងមាន ការប្រឡងប្រជែងស្នាដៃសិល្បៈពីរទម្រង់ គឺសម្តែងល្ខោននិយាយឈុតខ្លី និងចម្រៀងសម័យរបស់កុមារ ព្រមទាំងមាន ការបង្ហាញជូននូវទស្សនីយភាពរបាំប្រពៃណីផងដែរ។ ទាំងនេះ បានបង្ហាញពីការយកចិត្តទុកដាក់របស់ថ្នាក់ដឹកនាំខេត្ត មន្ទីរជំនាញ អង្គភាពពាក់ព័ន្ធ ក្មួយៗទាំងអស់ ក្នុងការចូលរួមលើកស្ទួយ អភិរក្ស និងអភិវឌ្ឍវិស័យវប្បធម៌ជាតិយើងយ៉ាង ពិតប្រាកដ។ 

 សូមបញ្ជាក់អោយដឹងថា មហោស្រពសិល្បៈយុវជន និងកុមារក្នុងខេត្តដែររៀបចំដោយ មន្ទីរវប្បធ៌ម និងវិចិត្រសិល្បៈខេត្តកោះកុង គឺ ដើម្បីជ្រើរើសរកបេក្ខជនឆ្នើមក្នុងខេត្ត ដោយមានចំនួន 2វិញ្ញាសារ គឺ ផ្នែកល្ខោននិយាយឈុតខ្លី និងចម្រៀងសម័យកុមារ ក្នុងនោះវិញ្ញាសារល្ខោននិយាយឈុតខ្លី មានបេក្ខជនចូលរួមប្រឡង ចំនូន3ក្រុម និងវិញ្ញាសាចម្រៀងសម័យកុមារ មានបេក្ខជនចូលរួមប្រឡង ចំនួន 64នាក់ ។

       សម្រាប់ផ្នែកវិញ្ញាសារល្ខោននិយាយឈុតខ្លី ជ្រើសរើសយកលេខ1 លេខ2 និងកេខ3 ដោយលទ្ធផល 

- លេខ1 បានលើក្រុមយុវជន មកពីសិស្សវិទ្យាល័យ ចំណេះទូទៅ និងបច្ចេកទេសតេជោសែនកោះកុង ទទួលប្រាក់រង្វាន់ចំនួន 1.500.000 រៀល។

- លេខ2 បានលើក្រុមយុវជនមកពី សិស្សវិទ្យាល័យ ចំណេះទូទៅ និងបច្ចេកទេសតេជោសែនកោះកុង ទទួលប្រាក់រង្វាន់ចំនួន 1.200.000 រៀល។

- លេខ3 បានលើយុវជនមកពី វិទ្យាល័យ ហ៊ុនសែន ប៉ាកខ្លង ទទួលប្រាក់រង្វាន់ចំនួន 1.000.000 រៀល។

      ចំនែកវិញ្ញាសារ ចម្រៀងសម័យកុមារ 

- លេខ1 មាន2នាក់ គឺ កុមារា ឈ្មោះ ជាសុវណ្ណវិទូ និងកុមារី ឈ្មោះ នូ ណា ទទួលបានប្រាក់រង្វាន់ ក្នុងម្នាក់ៗ ចំនួន 500.000 រៀល។

- លេខ2 មាន2នាក់ គឺកុមារា ឈ្មោះ ម៉ុង សៀវជី និងកុមារី ឈ្មោះ ម៉េង ណាលីស ទទួលបានប្រាក់រង្វាន់ ម្នាក់ៗ ចំនួន 400.000 រៀល។

- លេខ3 មាន2នាក់ គឺកុមារា ឈ្មោះ ភឿន សុភារ៉ាត់ និងកុមារី ឈ្មោះ កាក់ សុធាវី ទទួលបានប្រាក់រង្វាន់ ម្នាក់ៗ ចំនួន 300.000 រៀល។ 

លោកជំទាវ  សូមលើកទឹកចិត្ត និងជម្រុញ ÷ ដល់លោក លោកស្រី លោកនាយក លោកគ្រូ អ្នកគ្រូ អាណាព្យាបាល ពិសេសក្មួយៗ សូមចូលរួមសកម្មភាពវប្បធម៌ និងសិល្បៈនានា ឱ្យបានខ្លាំងក្លា ដើម្បីចូលរួមថែរក្សា ការពារលើកស្ទួយតម្លៃវប្បធម៌ជាតិ និងដើម្បីភា

ពជាគំរូដល់ក្មេងជំនាន់ក្រោយ៕